Çmimet e naftës kanë shënuar rritje të re sot, ndërsa tregjet ndërkombëtare mbeten të ndjeshme ndaj zhvillimeve politike mes Shteteve të Bashkuara dhe Iranit, ku armëpushimi i brishtë vazhdon të ngjallë pasiguri.
Nafta e papërpunuar Brent me kontratë për dorëzim në korrik u rrit me 0.75%, duke arritur në 104.99 dollarë për fuçi. Ndërkohë, në fillim të javës, çmimi kishte shënuar një rritje më të fortë, duke u afruar deri në 105.99 dollarë, ose rreth 5% më shumë se më parë.
Gjatë natës nuk janë regjistruar zhvillime të rëndësishme në tregje, por tensionet politike kanë mbetur në qendër të vëmendjes. Presidenti amerikan Donald Trump ka ashpërsuar deklaratat e tij ndaj Iranit, duke vënë në dyshim qëndrueshmërinë e armëpushimit që sipas tij “varet nga një fije”.
Trump e ka cilësuar një propozim të Teheranit për paqe si “të pabazë”, duke theksuar se situata mbetet e brishtë, ndonëse ai ende shpreh besimin se një zgjidhje diplomatike është e mundshme.
Nga ana tjetër, mediat shtetërore iraniane raportojnë se Teherani kërkon dëmshpërblime për dëmet e shkaktuara nga konflikti, sovranitet të plotë mbi Ngushticën e Hormuzit, heqjen e sanksioneve ekonomike dhe lirimin e aseteve të ngrira jashtë vendit.
Në këtë propozim, çështja e programit bërthamor të Iranit nuk është përfshirë ende, duke lënë të hapur një nga pikat kryesore të mosmarrëveshjes mes palëve.
