Duke nisur nga dita e sotme, e mërkurë 15 prill, në kryeqytet ka hyrë në fuqi reduktimi i numrit të autobusëve urbanë. Një ditë më parë, Shoqatat e Transportit Urban dhe Interurban njoftuan se do të ulin me 40% flotën në qarkullim, duke argumentuar se mungesa e masave nga qeveria për subvencionimin e karburantit i ka vendosur operatorët në vështirësi serioze financiare. Kjo situatë është përkeqësuar më tej nga rritja e çmimeve, e ndikuar nga konflikti në Lindjen e Mesme.
Në deklaratën e tyre, shoqatat theksuan se mungesa e reagimit dhe e veprimeve konkrete nga institucionet përkatëse ka rënduar ndjeshëm gjendjen e operatorëve, të cilët tashmë e kanë të vështirë të vijojnë aktivitetin normal. Për këtë arsye, reduktimi i flotës me 40% konsiderohet si një masë e detyruar për të përballuar situatën emergjente.
Megjithatë, përfaqësuesit e sektorit u shprehën të hapur për dialog dhe bashkëpunim, duke theksuar nevojën për ndërhyrje të menjëhershme dhe efektive nga ana e qeverisë.
Shoqata Kombëtare e Transportit Qytetas dhe ajo e Transportit Urban dhe Interurban u kanë bërë thirrje qytetarëve për mirëkuptim, duke i këshilluar të planifikojnë paraprakisht kohën e udhëtimeve për shkak të kufizimeve të reja.
Sipas tyre, pavarësisht shqetësimeve të ngritura prej javësh dhe një takimi të zhvilluar më 1 prill 2026, ende nuk është marrë asnjë vendim konkret për mbështetjen e operatorëve. Nuk është miratuar asnjë skemë kompensimi për rritjen e çmimit të karburantit, mungon një plan i qartë veprimi për lehtësimin e barrës financiare, si dhe nuk janë përcaktuar afate konkrete për ndërhyrje nga institucionet përgjegjëse.
Gjithashtu, sipas shoqatave, nuk ka nisur ende asnjë proces për rishikimin e elementeve fiskale që ndikojnë drejtpërdrejt në kostot operative, përfshirë akcizën, taksën e qarkullimit dhe TVSH-në.
